Сугыш корбаннары – бабаларым! (шигърият)

Сугыш корбаннары - бабаларым,

Туган илен, җирен, балаларын,

Йөрәк түрендәге сөйгән ярын,

Сагынып-сагынып башын җиргә салган

Батыр йөрәкләргә багышлыйм!

Кайта алмадың, бабам, кайта алмадың.

Йөрәгеңә сагынып-сагынып җыйган

Кайнар сүзләреңне әйтә алмадың.

Җиңү яулап ярты дөнья үтсәң дә син,

Туган якларыңа кайтып җитә алмадың.

Кайда синең, бабам, соңгы җирең?

Кайда сиңа туфрак салынган?

Әрни-әрни чыккан изге җаның

Туган якларгамы юл алган?

Әллә мәңгелеккә китеп югалган...

Заһид САФИН, Кукмара

http://www.qli.ru/?p=44368&cpage=1