Кукмара районы башлыгы махсус хәрби операция зонасыннан вакытлыча ялга кайткан хәрбиләр белән очрашты

Район башлыгы Сергей Димитриев махсус хәрби операция зонасыннан вакытлыча ялга кайткан якташларыбыз, аларның тормыш иптәшләре белән очрашты, хәл-әхвәлләрен белеште, рәхмәт сүзләрен ирештерде. Аралашу, сөйләшү чәй өстәле артында алып барылды. 

Сергей Димитриев хәрбиләр һәм аларның якыннары биргән бер генә сорау-мөрәҗәгатьнең дә игътибарсыз калмаячагын билгеләп үтте. Егетләр күрсәткән ярдәмнәре һәм теләктәшлек өчен райондашларга рәхмәт сүзләрен ирештерделәр.

Кукмара беренче гимназиясенең яшъгвардиячеләре дә килгән иде. Алар хәрбиләрнең исән-имин туган якларга кайтуларын теләделәр, укучылар язган хатларны тапшырдылар, үзләрен кызыксындырган сорауларны бирделәр.

Район башлыгы Сергей Димитриев очрашуда катнашкан гүзәл затларны якынлашып килүче 8 Март бәйрәме белән котлады, чәчәк бәйләмнәре белән сөендерде.

Фото: Алсу Сәләхетдинова/ «Хезмәт даны»

«Кукмор Татарстан» МАКС каналына язылыгыз