Районыбызның өлкән буын волонтерлары социаль проектта катнаша

"Тылсым" халыкка социаль ярдәм күрсәтү үзәгенең өйләргә барып ярдәм күрсәтү бүлекчәсе инде өченче ел рәттән социаль проектлар конкурсында актив рәвештә катнашып килә.

-Безнең беренче проект "Кайсыгызның кулы җылырак?" дип аталса, икенчесе - "Волонтерлар хәрәкәте (өлкән буын). Икенче проект белән конкурста җиңү яулап, 150 мең сумлык грант оттык. Әлеге грант кысаларында поселокның "Лилия" ательесында өлкәннәргә сәхнә костюмнары тектердек, техник җиһазлар алдык, - ди үзәкнең өйләргә барып ярдәм күрсәтү бүлекчәсе мөдире Роза Фазлыева. - Волонтерларыбыз бик актив. Без бергәләп юбилей даталары, төрле бәйрәмнәр уңаеннан өлкәннәрнең өйләренә барабыз, концертлар куябыз. "Волонтерлар хәрәкәте (өлкән буын)" проектын "Гражданлык инициативасы" бәйгесенә дә тәкъдим иттек.

фото: http://hobkirk.org/?cat=7