Кукмарада зур йөк машинасы янды (+фото)

Бүген иртәнге якта Зур Кукмара авылындагы "7 километр" кафесы янында зур йөк машинасы янды.

Кукмара янгын сүндерү частена бу турыда хәбәр 4 сәгать 35 минутта алына һәм ут белән көрәшергә 3 янгын сүндерү машинасы чыгып китә. Мәскәүдән килгән зур "фура" шоферы кафеның кунакханәсенә кичке якта урнаша. Машина кузовына Кукмараның бер сәүдә ноктасына кайтарылучы 23 миллион сумлык товар - аяк киемнәре төялгән була.

-Мине кунакханәдә йоклап ятканда күршем уятты, - ди 177нче регионнан килгән әлеге машинаның шоферы Александр Мартынов. -Йөгереп урамга чыкканда аны ут чорнап алган иде инде. Аннары бер-бер артлы машинаның тәгәрмәчләре шартлый башлады. Ягулык багына ут капмагае дип борчылдым, ярый әле ул шартламады.

"Фура"ның кузов өлеше яраксызга әйләнсә дә, машинаның кабинасына әллә ни зыян килмәгән иде, ахрысы.
-Ни сәбәпле машинага ут капканын ачыклау өчен хәзергә тикшерү, шаһитләрдән сораштыру бара,- ди янгын күзәтчелеге инспекциясенең дознавателе Эльбрус Әхмәтҗанов.- Казаннан махсус лаборатория килгәнен көтәбез.

Тикшерү нәтиҗәләре билгеле булгач, сайтта яңадан бу турыда язма әзерләнәчәк.