Кукмарада соңгы өч көндә 12 авария булган

Җиһанны аклыкка төреп яуган карга бу көннәрдә сөенеп бетә алмадык. Ниһаять, кыш килде бит. Әмма көннәрнең әле җылытып, әле салкынайтып торуы шактый уңайсызлыклар тудыра, дисәк тә ялгыш булмас. Җәяүлеләр юлы - тротуарларны боз элпәсе каплаганлыктан, кайбер урыннарда бөтенләй атлап йөрерлек түгел. Транспорт йөртүчеләр дә кышка ияләнеп бетә алмый - күбесе машина тәгәрмәчләрен әле яңарак кына кышкыга алыштырган. Автомобиль трассаларында урыны белән бозлавык. Район юл хәрәкәте иминлеге дәүләт инспекциясеннән алынган мәгълүматларга караганда, соңгы өч көндә районыбыз юлларында 12 юл-транспорт һәлакәте булган.

-Бәхеткә каршы, фаҗигаләрдә зыян күрүчеләр юк, - диләр инспекторлар. -Юлларда һәркемнең игътибарлы һәм сак булуын, тиешле тизлекне саклап, юл йөрү кагыйдәләрен үтәүләрен сорыйбыз. Юлда йөрүчеләр һава торышын да исәпкә алсыннар иде.

фото: http://defacto-spb.ru