"Игътибар – балалар!" акциясе нәтиҗәләре

Балалар катнашында килеп чыккан юл-транспорт фаҗигаләрен кисәтү максатында республикада "Игътибар - балалар!" акциясе узды. Район юл хәрәкәте иминлеге дәүләт инспекциясенең пропаганда бүлеге инспекторы Ранил Гыйниятуллин сүзләренә караганда, акция кысаларында инспекторлар мәгариф учреждениеләрендә, балалар бакчаларында, автотранспорт хуҗалыгында булып кисәтү-аңлату әңгәмәләре алып барганнар, ата-аналар, балалар белән очрашканнар.

-Рейдлар вакытында автомобиленә махсус балалар утыргычы урнаштырмыйча хәрәкәт иткән 27 шоферга, балага иминлек каешы куймаган 24 әти-әнигә беркетмәләр төзелде. Җәяүлеләргә юл бирмәгән 66 автомобиль йөртүче штрафка тартылды, - ди ул. - Шулай ук җәяүлеләр юлында тиешле таләпләрне үтәмәгән 24 җәяүле, 9 шофер, бер велосипедчыга да штраф түләргә туры киләчәк. Таләп ителгән кагыйдәләр акция барган чорда гына түгел, һәрдаим үтәлсен, кечкенә пассажирларга карата аеруча игътибарлы булсак иде.