Адай авылы клубында шәфкатьлелек сәгате узды (+Фото)

Адай авылы клубы мөдире шәфкатьлелек атналыгы уңаеннан башлангыч мәктәп укучылары белән "Шәфкатьлелек бизи кешене" дип исемләнгән тәрбия сәгате уздырды. Балалар мәрхәмәтле, изге күңелле кешеләрнең эш-гамәлләре белән таныштылар, аларның кешелеклелек кебек яхшы сыйфатларын үзләренә өлге итеп алдылар. Укучылар үзләренең күрше-тирә әби-бабайларына ничек тимурчылык итүләре турында сөйләделәр, олыны - олы, кечене кече итәргә кирәклегенә төшенделәр. Кече туганнарыбыз хайваннар һәм табигать тә безнең ярдәмгә мохтаҗ икән бит! Клуб мөдире Фәния Хәбибуллина монысын да читтә калдырмады. Бу тәрбия сәгате "Кояшлы" уены белән тәмамланды. Кояш елмайган, бар җиһанны җылыткан кебек чарада катнашучылар да кулга-кул тотынышып, озак вакытка җитәрлек җылылык, көч алып таралыштылар.