Кукмарада 400гә якын кеше коронавирустан вакцина ясаткан

Бүгенге көндә Кукмарада 400гә якын кеше коронавирустан вакцина ясаткан. Бу турыда район үзәк дәваханәсенең табиб-эпидемиологы Илназ Фәйзуллин сөйләде.

«Бүгенге көндә районда 390 кеше “Гам-КОВИД-Вак” вакцинасы ясатты, шуларның 133е икенче дозаны да алды. Аларның күбесе - медицина хезмәткәрләре һәм табиблар. Беркемнең сәламәтлегендә тайпылышлар күзәтелмәде», - диде Илназ Фәйзуллин.

Табибның сүзләренә караганда, дәваханәгә яңадан 330 кешелек вакцина кайтты. Ул махсус суыткычларда минус 18 градуста саклана. Әлегә кадәр кулланылган вакцинаның бер ампуласы 5 кешегә исәпләнгән иде. Ә яңа партиядә бер ампула бер генә кешегә ясала.

Иммунизация узарга теләүчеләр яшәү урыны буенча гомуми практика табибына яки фельдшерына (поликлиника, участок дәваханәсе, ФАП) мөрәҗәгать итә ала.

8(84364) 2-74-20 телефоны буенча – регистратурага, 122 номерына  шалтыратып, кайнар линия аша да язылырга мөмкин. 

Район үзәк дәваханәсенең икенче катында урнашкан 211нче кабинетта - эпидемиолог, шулай ук 223нче прививка ясау кабинетында да сезне кабул итәчәкләр. 

Моннан тыш, дәваханәнең Инстаграмдагы рәсми kukmor_crb аккаунтының директына да языла аласыз. Анда үз мәгълүматларыгызны – фамилия, исем, әтиегезнең исемен, туган елыгызны һәм телефон номерыгызны калдырырга кирәк. 

Шулай ук хәзер Татарстан һәм Россия бердәм дәүләт хезмәтләре порталы аша да язылырга була.

Фото: Эльвира Мөбарәкшина, Ризилә Корбанова/ «Хезмәт даны»