Хезмәт даны
  • Рус Тат
  • Этләрне яратыгыз!

    -Хөрмәтле радиотыңлаучылар! Бүгеннән башлап дулкыннарыбызда "Хайваннар дөньясында" дигән өр-яңа сәхифә ачып җибәрәбез. Кече туганнарыбыз тормышы белән сез хәзер телевизор карап кына түгел, радиоалгычлар аша да таныша алырсыз. Бүгенге тапшыруыбызның кунагы - Габделкәрим үзенең дүрт аяклы дусты Акбай белән. Нинди сөйкемле эт! Яле, бир тәпиеңне, Акбай! Тешләргә ярамый! Җибәр, җибәр, дим...

    Реклама

    -Хөрмәтле радиотыңлаучылар, кече туганнарыбызның бер вәкиле Акбай белән танышуыбызны дәвам итик. Бигрәк шук инде үзе! Нәсел-нәсәбе турында сөйләгезче, Габделкәрим. Затлы нәселдәндер бит?
    -Ә кәкже, затсызны асрамыйбыз. Безнең авыл нәселе түгел, күрше авыл Гаптриеннән алып кайттым. Ана эте бөтенләй ычкынып, өч көн югалып торган ие, шуннан соң туган көчек инде.
    -Холкы, гадәтләре нинди соң?
    -Гаптринең үзенә тамчы да охшамаган. Капкадан бер адәмне дә кертми, маладис. Әле беркөн әнигә пинсә китергән пушты кызын чабуыннан эләктергән, ха-ха. Менә моннан алдагысы жүнсез булды, Сарбайны әйтәм. Барысына да койрык болгап тора иде. Җенем сөйми куштаннарны! Салган баштан теге дөньяга олактырдым мин ул сабакыны!
    -Э-э-э, әйе, эһем... Реклама тыңлап алсак, ничек булыр?
    "Яраткан этегезнең күп еллар буена яшь, матур булып калуын телисезме - "Мисс Маэмай" салонына рәхим итегез! Яшәртә торган битлекләр, йоннарын химик бөдрәләтү, массаж һ.б. күптөрле хезмәтләр тәкъдим ителә!"
    -Тапшыруны дәвам итәбез. Габделкәрим, этең нинди ризыкларны аеруча ярата, ничек туклана?
    -Вәт кызык кеше булып чыктың син! Ничек туклана, имеш! Эткә сөяк инде ул. Әчегән ашны да чыгарып салам - ашамый карасын!
    -Тапшыруыбыздан күчтәнәч итеп сезгә ике кап "Педигрипал" бирергә булдык. Витаминнарның тулы комплексын.
    -Ниткән нәрсә соң ул? Һы, тәмле икән, кабымлыкка ярый. Пшул, кая танавыңны сузасың? Утыр, дим, урыныңа!
    -Габделкәрим, радиотыңлаучыларга нинди яңа теләкләрегез бар?
    -Теләкләр? Һы... Эткә -эт үлеме! Юк, болай әйтү ярамас. Эткә таяк күрсәтмәгез! Монысы да әллә ничегрәк! Вупчем, этләрне яратыгыз!
    -Тапшыруыбызга килүегез өчен рәхмәт, Габдел..., Габ...Гы... Пшул, сабакы! Яр... ярдәм итегез!
    Гөлҗофар МИННЕХАНОВА

    Нравится
    Поделиться:
    Реклама
    Комментарии (0)
    Осталось символов: