Татарстан авылларында өй интернеты буенча сораштыру вакыты озайтылды

Татарстанның кечкенә торак пунктларында яшәүчеләр өчен өй интернетына тоташу ихтыяҗын ачыклау максатыннан үткәрелгән сораштыру 30 апрельгә кадәр озайтылды. Бу хакта республика Цифрлы үсеш министрлыгы хәбәр итә.

Сораштыру нәтиҗәләре нигезендә кайсы авылларга һәм бистәләргә югары тизлекле интернет беренче чиратта үткәреләчәге билгеләнәчәк. Аерым йортларны тоташтыру өчен кирәкле инфраструктураны төзү универсаль хезмәт күрсәтү резервыннан финансланачак.

Әлеге фонд Россия элемтә операторлары кеременең бер өлешеннән формалаша һәм хәзерге вакытта база станцияләре төзүгә, җепселле-оптик элемтә линияләре сузуга юнәлтелә.

Сораштыруда халкы 100дән 1000 кешегә кадәр булган һәм инде элемтә инфраструктурасы булдырылган авыллар катнаша ала. Мәсәлән, анда мәктәпләр яки медицина учреждениеләре интернетка тоташтырылган булырга тиеш.

Катнашу өчен «Дәүләт хезмәтләре» порталы аша авторизация үтәргә, төбәкне һәм төгәл адресны күрсәтергә кирәк. Сораштыру аноним рәвештә үткәрелә, нәтиҗәләр гомумиләштерелгән статистика форматында тәкъдим ителәчәк.

Сораштыруны түбәндәге ике сылтаманың берсе буенча узарга мөмкин: https://pos.gosuslugi.ru/lkp/polls/583426/ һәм https://pos.gosuslugi.ru/lkp/polls/568138/

Шунысын да истә тотарга кирәк: йортны интернетка тоташтыру өчен бер тапкыр түләү каралган, шулай ук ай саен абонент түләве дә булачак.

Әлеге программа «Мәгълүматлар икътисады һәм дәүләтнең цифрлы трансформациясе» илкүләм проекты кысаларында гамәлгә ашырыла. 2021 елдан бирле шушы механизм ярдәмендә 6,7 меңнән артык торак пункт мобиль интернет белән тәэмин ителгән, ә 2026 ел ахырына кадәр тагын 100 авылны киң полосалы интернетка тоташтыру планлаштырыла.