Кукмарада рецидивист бергә яшәүче хатынын кыйнаган һәм үтерү белән янаган өчен хөкем ителәчәк

Кукмара районы прокуратурасы элек хөкем ителгән 41 яшьлек ир-атка карата җинаять эше буенча гаепләү актын раслады. Ул кеше үтерү белән янау, хөкем ителгән зат тарафыннан физик авырлык китереп кыйнауда гаепләнә. 

Эш материаллары буенча, быелның 4 гыйнварында төнлә гаепләнүче Шепшеңәр авылындагы өендә бергә яшәүче хатын-кыз компаниясендә спиртлы эчемлек куллана. Шул вакытта алар арасында конфликт килеп чыга да, ир-ат башта хатын-кызның йөзенә суга һәм аны буа башлый, ә аннары пычак алып, үтерү белән яный. Хатын янауларны чын дип кабул итә һәм полициягә гариза яза. 

Ир-ат үз гаебен өлешчә таныды. Җинаять эше район судына карау өчен җибәрелде.