Кукмарада киңәйтелгән киңәшмә узды

Район Мәдәният йортында үткән киңәйтелгән киңәшмәне район башлыгы Сергей Димитриев бүген республиканың торак пунктларында санитар-экологик икеайлык башланды дип ачты. 

«Әлеге айлык 31 майга кадәр дәвам итәчәк. Иртәгә, ягъни 2 апрельдә районкүләм өмә игълан ителде. Шул уңайдан һәркемне актив катнашуы сорала. Барлык җитәкчеләр үзләренең эш урыннарында өмәләр оештырырга һәм ведомство карамагындагы территорияләрне тиешле хәлгә китерергә тиеш», — диде ул. 

Санитар-экологик икеайлыкка әзерлекнең барышы турында Башкарма комитет җитәкчесенең беренче урынбасары Чулпан Хәнәфина таныштырды. 

9 Майда илебез Бөек Ватан сугышында Җиңүнең 80 еллыгын бәйрәм итәчәк. Бу бәйрәм Россия халкы өчен бик зур әһәмияткә ия, бигрәк тә бүгенге көндә. Районыбызда Җиңү көнен бәйрәм итүгә әзерлекнең барышы турында Башкарма комитет җитәкчесе урынбасары Айгөл Әхмәтшина сөйләде.

Ә Ядегәр авыл җирлеге башлыгы Айдар Фәйзуллин узган ел җирлектә башкарылган эшләр белән таныштырды. Лельвиж урта мәктәбе эше турында директор Евгений Капитоновның чыгышы да тыңланылды. 

«2014-2025 елларда Татарстан Республикасы мәдәниятен үстерү» дәүләт программасы буенча «Кече Ватан мәдәнияте» партия проекты кысаларында районыбыз 4 модульле китапханә алды. Алар Әсән Елга, Манзарас, Ядегәр, Олыяз мәдәният йортларында эшли башлады. Быел исә Байлангар мәдәният йортында планлаштырыла. Бу китапханәләрдә китап уку, аларда шөгыльләнү, халыкның ялы өчен дә барлык шартлар тудырылган. Манзарас авыл китапханәсендә нинди эш алып барылганыны турында мөдир Фирая Сабирова бик эчтәлекле итеп таныштырды. Утырышны йомгаклап, район башлыгы алдагы көннәргә районда планлаштырылган эшләр турында аңлатып үтте, «Солдатка бүләк» акциясен башлана, барыгызның да актив катнашуыгызны сорыйбыз, — диде ул. 

Утырышта бер төркем райондашыбызга мактаулы бүләкләр, грамоталар тапшырылды.

фото: Лилия Нургалиева, Эльвира Иванова/ «Кукмор-информ»