Кукмарада яшәүче Ирина Григорьева сливадан соус ясау рецепты белән бүлеште

Сливадан кайнатма, сок кына түгел, тәмледән-тәмле соус, кетчуп та ясарга мөмкин. Бәрәңге, токмач, карабодай, дөге белән ашау өчен, менә дигән соус рецептын тәкъдим итәсем килә. 

Кирәкле кушылмалар: 2 килограмм слива, 1 суган, 1 тырнак сарымсак, 3,5 стакан шикәр комы, 2 стакан аш серкәсе (алманыкы), 1 аш кашыгы горчица порошогы, 1 аш кашыгы төелгән имбир, 1 чәй калагы төелгән корица, 1 чәй калагы төелгән кызыл борыч, 0,5 чәй калагы төелгән канәфер.

Сливаның төшләрен алыгыз. Йомшагын суган һәм сарымсак белән бергә блендерда изегез. Килеп чыккан катнашманы калын төпле кәстрүлгә салыгыз. Калган кушылмаларны өстәп, кайнатып чыгарыгыз. Әледән-әле болгатып, 1-1,5 сәгать чамасы пешерегез. Кайнар соусны стерильләштерелгән банкаларга тутырып, тимер капкач белән ябыгыз.