Кукмара районында яшәүче бер ханымны алиментлар буенча 300 мең сумнан артык бурычы өчен хөкем итәчәкләр

Кукмара районында яшәүче бер ханымны алиментлар буенча 300 мең сумнан артык бурычы өчен хөкем итәчәкләр. Бу хакта Кукмара районы прокуратурасы хәбәр итә. 

41 яшьлек ханым биш айдан артык балигъ булмаган улын тәрбияләү өчен акча түләмәгән. Нәтиҗәдә, алиментлар буенча бурыч 300 мең сумнан артып киткән. 

Элегрәк тә хатын шундый ук хокук бозу өчен административ һәм җинаять җаваплылыгына тартылган булган. Ул чакта суд аңа шундый ук сынау вакыты белән шартлы рәвештә алты ай ирегеннән мәхрүм итү җәзасын билгеләгән. 

Хатын үз гаебен тулысынча таныды. Аңа “Балаларны тәрбияләү өчен акча түләмәү” маддәсе буенча җинаять эше кузгатылды. Җинаять эше район судына җибәрелде.