Зур Кукмара җирлегендә халык җыены үтте

Җирле үзидарә органнарының 2015 елгы эш нәтиҗәләренә багышланган җыелышларның чираттагысы Зур Кукмара авылының күпфункцияле үзәгендә үтте. Бу уңайдан җирлек башлыгы Ришат Хәнәфиев бирегә җыелган халык алдында хисап тотты. Әлеге вазыйфаны ярты ел гына башкаруына карамастан, җирлектәге тормыш шартларын яхшырту өчен шактый эшләр эшләнгән. Киләчәккә билгеләнгән бурычлар да зурдан. "Кукмара" агрофирмасы җитәкчесе Рөстәм Мөбарәкшин, территориаль үсеш бүлеге җитәкчесе Талия Насыйбуллиналарның эчтәлекле чыгышлары кызыксыну белән тыңланды. Район Башкарма комитеты җитәкчесе Азат Гарифуллин үзенең чыгышында үткән елда районда башкарылган эшләргә тукталды. Җыелышта халыкның сорау-тәкъдимнәренә җаваплар бирелде. Җыелыш бер төркем хезмәткәрләрне фидакарь хезмәтләре өчен бүләкләүләр һәм район Мәдәният йорты үзешчәннәренең концерты белән тәмамланды.