Кукмарада сайлауга килүчеләргә камыр ашлары тәкъдим ителә (фото)

(Кукмара, 18 сентябрь, "Хезмәт даны", Алсу Идрисова). Кукмараның 1669нчы номерлы сайлау участогына килүчеләр, үз тавышларын биргәннән соң, компот, кайнар чәй һәм берсеннән-берсе тәмле камыр ризыклары белән дә сыйлана ала.

-Дучмак, өчпочмак, кыстыбый һәм башка камыр ризыкларыннан тыш, голубцы да тәкъдим итәбез. Барысын да ашханәдә үзебез әзерләдек. Бик яратып алалар, - диләр пешекче кызлар Гөлшат һәм Нурсибә.

-Вак бәлеш, дучмак сатып алдым. Бәясе бер дә кыйммәт түгел. Өйгә кайткач гаилә белән җыелып, тәмләп чәй эчәрбез, - ди Фирдәүсә ханым. - Сайлау участогына һәрчак бәйрәмгә барган шикелле сөенеп барабыз. Сайланачак депутатлар халыкның тормышын тагын да яхшырту өчен тырышлык куярлар дип ышанам.