- Коррекцион мәктәпләр дә булырга тиеш. Аларның тәҗ­рибәсен югалтырга ярамый. Шуңа күрә бу уку йортларын ресурс үзәкләре итеп үзгәртергә мөмкин. Илдә 280­­ләп коррекцион бакча, мәк­тәп яшәүдән туктады. Андый мәктәпләрне япканда әти-әниләрнең фикерен исәп­кә алырга кирәк, - дип белдерде Дәүләт Думасы депутаты Олег Смолин Казанда узган халыкара конфере­н­циядә.

Олег Смолин фикеренчә, инклюзив белем бирү, ягъни сау-сәламәт һәм авыру балаларны бергә укыту өчен укытучыларның да әзер булуы кирәк. Яңа уку елыннан сәламәтлегендә проблемалар булган беренче сыйныф укучылары өчен махсус стандартлар кертелә. Әмма әлегә дәреслекләр җитми икән. Депутат инвалидларга вузларда бюджет урыннарының санын, стипендияләренең кү­ләмен арттырырга кирәк дип саный.

- Инклюзив белем бирү авыру балаларга гыйлем алу мөмкинлекләрен арттырырга ярдәм итә. Бүген мәк­тәпләрдә 4 меңгә якын инвалид һәм 1 мең 712 физик мөмкинлекләре чикләнгән бала укый. 2 мең 396 укучыны өйләренә килеп укыталар. 300ләп мәктәптә "Уңайлы мохит" программасы буенча шартлар тудырылган, - дип сөйләде Татарстан мәгариф һәм фән министры Энгель Фәттахов.

Министр белдергәнчә, республикада авыру балаларны укыту өчен педагог­лар әзерләү эшенә зур игътибар бирелә. Бүген коррекцион мәктәпләрдәге бер мең дефектолог белемен күтәр­гән. Шуның кадәр үк мәктәп мөгаллимнәре курслар уз­ган. Казандагы 78 нче мәктәп базасында ресурс үзәге оештырылган. Әлеге тәҗрибә рес­пуб­ли­каның башка мәк­тәп­ләренә дә таратылачак.

Дәүләт Советы Рәисе урынбасары Римма Ратникова исә Зур концертлар залын­да узган тамашада күр­гән­нәре белән уртаклашты. "Залда коляска белән килгән инвалид балалар да бар иде. Алар яшьтәшләре белән аралашты. Мәдәни чараларга йөр­түне өстәмә белем буларак та кертергә була", - диде ул. Инвалидларга шартлар тудыру, укытучылар әзерләү - боларның барысын да хәл итәргә була. Барыннан да бигрәк сау-сәламәт балалар­ның аларны кабул итүе мө­һим. Без моңа ничек ирешербез икән?

"Мин Әстерханда "Йөрәк­тән - йөрәккә" волонтерлар хәрәкәтен җитәкләдем. Күп­тән түгел Казанга күченеп, бу эшне дәвам итәм. Авыру балаларга ярдәм итү теләге кызым Әдилә үлгәннән соң туды. 12 ел коляскада утырса да, анда уку теләге көчле иде. Церебраль паралич белән авырды. Мәктәпне уңышлы тәмамлады, юрист һөнәрен үзләштерә башлаган иде. Әмма 4 нче курста укыганда якты дөньядан китеп барды. Аның авыру балалар өчен клуб ачасы килгән иде. Те­ләген тормышка үзем ашыр­дым, - ди Зөһрә Сәет­батта­лова. - Бүген инвалид балаларга мәктәптә белем алу мөмкинлеге тудыру бик әй­бәт. Мин кызыма китап­ханә­ләрдән китаплар алып кайта идем. Авыру балаларны сәламәт укучылар кабул итсен өчен мәк­тәп­ләргә, вузларга барып, тәр­бия сәгать­ләре үткәрәбез. Аларга тормышта теләсә кем авыр хәлдә калырга мөмкин дип аң­латабыз".

Сәрия МИФТАХОВА
Ватаным Татарстан