Спорт яңалыклары

Малмыжда шәһәр лицее призына 2003-2004 елгы яшүсмер малайлар арасында баскетбол буенча төбәкара ярышлар булды. Анда балаларны сәламәтләндерү-белем бирү үзәгендә тәрбияләнүчеләрдән торган Кукмара командасы беренче урынны яулады.

“Зилант” спорт мәктәбенең тренер укытучысы Альберт Шәңгәрәев (тренеры – Марес Бәдертденов) Казан шәһәрендә көрәш самбосы буенча “Татарстан Республикасы Президенты Кубогы”на узган Халыкара турнирда катнашып җиңү яулады.

“Зилант” спорт мәктәбенең самбо бүлегендә шөгыльләнүчеләр Ижевск шәһәрендә 2004-2005 елгы кызлар һәм малайлар арасында узган “Яшь Динамовчы” көрәш фестивалендә катнаштылар. 4нче урта мәктәптән Ландыш Хәкимова – беренче, Карина Мисюкевич (тренерлары – Энҗе Йосыпова) һәм күппрофильле лицейдан Ранил Газизуллиннар (тренеры – Марес Бәдертденов) икенче урынны яулады.

“Зилант” спорт мәктәбендә Өлкәннәр көне уңаеннан спорт ветераны Әхмәтшакир Шәрипов призларына өстәл теннисы буенча район ачык шәхси-команда беренчелеге булды. Ярышлар өч яшь төркеменә бүленеп үткәрелде. Анда барлыгы йөздән артык кеше катнашты. Күчмә кубокка Сәрдекбаш урта мәктәбе ия булды, икенче урынны – Туембаш төп мәктәбе, өченче урынны 4нче урта мәктәп яулады. Үз яшь  төркемендә беренче урынны Алсу Әюпова (Туембаш), Әхмәтшакир Шәриповлар (Кукмара) алды.

“Зилант” спорткомплексы һәм “Ялкын” яшүсмерләр клубында 2006-2007 елгы кызлар командалары арасында волейбол буенча ачык турнир үткәрелде. Ярышларда республика районнарыннан һәм Малмыж шәһәреннән килгән барлыгы унбер команда катнашты. Уен нәтиҗәләре буенча Кукмара командасы беренче урынны яулады.