Кукмара физик мөмкинлеге чикле спортчыларны үзенә җыйды

Кукмараның «Барс-Арена» спорт комплексында физик мөмкинлеге чикле кешеләр арасында өстәл уеннары буенча ярышлар узды. 

Ярышларда Кукмара, Саба районнары һәм Нократ Аланыннан килгән спортчылар көч сынашты. 

Район инвалидлар җәмгыяте җитәкчесе Равил Нигъмәтҗанов сүзләренә караганда, әлеге спорт чарасы Бөек Җиңү көненә багышланды.

«Өстәл уеннарын популярлаштыру, көчле уенчыларны ачыклау, сәламәт яшәү рәвешен пропагандалау, патриотлык хисе тәрбияләүгә багышланган ярышларда 14 яше тулган физик мөмкинлеге чикле һәркем катнаша ала. Алар джакколо, шаффлборд, новус, корнхолл, кальбутто дигән уен төрләрендә үз көчләрен сыный», — диде Равил Нигъмәтҗанов. 

Спортчылар бик актив булды, һәрберсе диярлек уеннарда катнашырга тырышты.

Җиңүчеләргә медальләр, бүләкләр тапшырылды.

Фото: Алсу Сәләхетдинова/ «Хезмәт даны»