Татарстанда соңгы тәүлектә коронавирус белән зарарлануның 23 яңа очрагы ачыкланган

Республикада Covid-19 белән зарарлануның 23 яңа очрагы расланган. Бу хакта «Татар-информ» мәгълүмат агентлыгына коронавирус буенча оператив штаб хәбәр итә.

Инфекция йоктырган 5 кеше хастаханәгә салынган, калган 18 кеше өендә дәвалана. Дүртесе – читтән кертелгән, калганнары элемтә нәтиҗәсендә авыручылар. 

Авыручыларның күбесе Казан шәһәрендә – 7 очрак. Яр Чаллы, Буа, Чүпрәле, Яшел Үзән районнарында – икешәр, Аксубай, Балтач, Югары Ослан, Биектау, Лаеш, Яңа Чишмә, Питрәч, Чистай районнарында – берәр очрак.

Татарстанда бу бөтен вакыт эчендә 7135 Covid-19 очрагы теркәлгән, 6020 кеше терелгән.

фото: «Татар-информ»