Кукмараның Комсомол мәйданындагы сәхнәне бәдрәфкә әйләндергәннәр

Бу көннәрдә шәһәрнең Комсомол мәйданындагы сәхнәне кемнәрдер бәдрәфкә әверелдергән. Бу турыда «Чиста шәһәр» оешмасының өлкән мастеры Рафисә Хаҗиәхмәтова хәбәр итте.

«Безнең хезмәткәрләр көн саен әлеге мәйданчыкны тәртипкә китерә. Сәхнәдәге ул шапшаклыкны да иң беренче булып алар күрде. Без шәһәр башкарма комитеты җитәкчелегенә хәбәр иттек, соңыннан җыештырып алдык. Тагын шуны да әйтәсем килә: утыра торган эскәмияләрнең күбесе көн саен күпер астында була. Иртә белән җыештырырга килүчеләрнең бер сәгать вакыты эскәмия ташып уза», - ди Рафисә Хаҗиәхмәтова.

Өлкән мастер кайбер шәхси йортларда яшәүчеләрнең чүп салынган капчыкларын газоннар өстенә чыгарып куюларына да ачына. «Болай да корылыктан үсеп китә алмый бит инде алар. Өстәвенә капчык тезәләр. Машина белән туктап, шәһәр эчендәге кечкенә чүп савытларына (урналар) пакет белән өйләреннән алып чыккан чүпне атып китүчеләр дә бар. Безнең хезмәтне хөрмәт итмәүләренә күңел әрни», - ди ул.

Җәмәгать бәдрәфләре буенча шәһәр башкарма комитетына шалтыратып, «Кукмарада алар кайларда урнашкан һәм эшлиләрме?» – дигән сорауны юлладык.

Түбәндәге җавап алынды: «Кукмарада өч җәмәгать бәдрәфе бар. Берсе – Атлас Булатов паркында, икенчесе – Ринат Мөхәммәшин исемендәге стадионда, ә өченчесе – район эчке эшләр бүлеге бинасы янында. Бүгенге көндә бәдрәфләрнең өчесе дә эшли».

Фото: Эльвира Мөбарәкшина/ «Хезмәт даны»