Кукмарада алиментлар түләмәүдә гаепләнүче 33 яшьлек ирне хөкем итәчәкләр

Кукмара районы прокуратурасы 33 яшьлек ир-атка карата җинаять эше буенча гаепләү актын раслады. Ул РФ Җинаятьләр кодексының 157 маддәсенең 1 өлешендә каралган (балаларны тәрбияләү өчен акча түләмәү) җинаять кылуда гаепләнә.

Сорау алу версиясе буенча, гаепләнүче балигъ булмаган улын тәрбияләү өчен ике айдан артык алимент түләмәгән. Гомуми бурычы 560 мең сумнан артып киткән. Ир элек тә шундый ук хокук бозу өчен административ җаваплылыкка тартылган булган.

Ул үз гаебен таныды.

Җинаять эше Кукмара район судына җибәрелде.