Кукмара укучыларына бозда зыян күрүчеләрне коткару һәм ярдәм күрсәтү ысулларын күрсәттеләр

Манзарас урта мәктәбе укучылары өчен бозда куркынычсызлык буенча күрсәтмә дәресләр оештырылды.

Дәресләр Кукмара районының Гражданнарны яклау идарәсе директоры Илназ Кәримов, укытучы Илшат Шәфигуллин, район Башкарма комитетының мәгариф идарәсе хезмәткәрләре, ОСВОД җитәкчесе Артур Зәкиев катнашында үткәрелде.

Балаларга бозда куркынычсызлык кагыйдәләре турында сөйләделәр, зыян күрүчеләргә ярдәм күрсәтү һәм коткару ысулларын  күрсәттеләр: үпкәләрне ясалма вентиляцияләү, жгут ярдәмендә кан агуны туктату, җылыту. Моннан тыш, балаларга коткару хезмәтләренең - 112, 101, 103 телефон номерларын искә төшерделәр, шулай ук үзеңнең кайда икәнлегеңне билгеләү буенча инструктаж уздырдылар.

Белгечләр сүзләренә караганда, балаларны беренче ярдәм күрсәтергә өйрәтә торган дәресләр бик мөһим. Бу - кирәкле күнекмә, ул кемнеңдер тормышын саклап калырга ярдәм итә ала.