Кукмара районында бер ир-ат, өйне янгыннан саклыйм дип, җәрәхәтләр алган

Кукмара районында 32 яшьлек ир-ат, өен янгыннан саклыйм дип, җәрәхәтләр алган. Бу хакта Кукмара районының 117нче янгын сүндерү-коткару частендә хәбәр иттеләр. 

5 апрельдә сәгать 16.25тә районның 117нче янгын сүндерү-коткару частенең элемтә пунктына телефон аша Кукмара районының Арпаяз авылы, Береговая урамындагы йортларның берсендә янгын чыгу турында хәбәр килеп ирешә. 

Янгын сүндерүчеләр килгәндә торак йорт тулысынча яна, ялкын телләренең өйдән 1,5 метр читтәге хуҗалык корылмаларына күчү ихтималы зур була. 

Нәтиҗәдә өй, агач сарай яна, күршедәге торак йортның тәрәзә пыялалары шартлый. 

Өйләрен янгыннан сакларга тырышкан 32 яшьлек ир кеше зыян күрә. Аны Кукмара районы үзәк дәваханәсенең ашыгыч ярдәм күрсәтү бригадасы алып китә. 

Янгын чыгуның якынча сәбәбе: электр җиһазларын урнаштыру һәм файдалану кагыйдәләрен бозу.

фото: Кукмара районының 117нче янгын сүндерү-коткару часте