Югары Шәмәрдәннән Мөсәлимә апа Бикмөхәммәтова 90ны тутырды

Югары Шәмәрдән авылында яшәүче Мөсәлимә апа Бикмөхәммәтова 90 яшьлек юбилеен билгеләп үтте. Юбилярны гомер бәйрәме белән район башлыгы урынбасары Резеда Гаянова, район социаль яклау бүлеге җитәкчесе Регина Мусина, Ядегәр авыл җирлеге башлыгы Айдар Фәйзуллиннар котлады. 

Туган көн иясенә район башлыгының Рәхмәт хаты, истәлек бүләге тапшырылды, бик матур теләкләр юлланды. 

Мөсәлимә апага тормышның әчесен-төчесен күп татырга туры килә: урман да кисә, күмәк хуҗалыкта маллар да карый ул. «Восток» хуҗалыгында күп еллар хезмәт куеп, лаеклы ялга чыга. 

Юбиляр тормыш иптәше Нурулла абый белән ике ул, ике кыз тәрбияләп үстерә. Кызганыч, гаилә башлыгы моннан ике ел элек вафат булган. Мөсәлимә апаның «әбием» дип өзелеп торучы 11 оныгы, 22 оныкчыгы бар. 

Мөсәлимә апа Бикмөхәммәтова улы Дамир абый, килене Нурия апа һәм оныгының гаиләсе белән бәхетле картлык кичерә.

Фото: Алсу Сәләхетдинова/ «Хезмәт даны»