Гадәттән тыш хәлләр министрлыгы дроннарны кул асты чаралары белән бәреп төшерүне тыйды

Россия Гадәттән тыш хәлләр министрлыгы халыкка пилотсыз очучы аппаратларны (БПЛА) күргән очракта башкарылырга тиешле гамәлләр турында киңәшләр урнаштырды. Гражданнарны дроннарны кул астындагы чаралар ярдәмендә бәреп төшерергә омтылудан тыелырга һәм килеп төшкән җайланмаларга якын килмәскә чакыралар. Бу хакта «Татар-информ» яза.

«БПЛА килеп төшкән очракта якын килергә, аңа кагылырга ярамый. Пилотсыз очкычны кул астындагы чаралар ярдәмендә бәреп төшермәкче булу да тыела», – диелә ведомство хәбәрендә (ТАСС цитатасы).

Моннан тыш, белгечләр табылган дрон янында радиоалгычлар, мобиль телефоннар яки GPS функциясе булган җайланмалар кулланмаска куша.

БПЛА ачыкланган очракта ким дигәндә 100 метр ераклыкка китәргә, биналар яки агачлар артында яшеренү өчен урын табарга, якын-тирәдәге кешеләрне кисәтергә һәм кичекмәстән 112 номерына шалтыратып ашыгыч хезмәтләр белән элемтәгә керергә киңәш ителә. Шулай ук ведомствода һава һөҗүменә каршы оборона эше белән бәйле процессларны һәм дроннар очканны видеога төшерү тыела, дип ассызыкладылар.

фото: «Татар-информ» МА