Кукмарам (шигъри мизгел)

Тау астына сибелгәндер безнең авыл,

Итәгендә чишмәләре чакрым саен.

Җәен-кышын саф һавасын биреп тора

Тауларыңны каплап үскән нарат-каен.

Горурланып тауларыңа менгәнем бар,

Сокланып мин сиңа өстән күзләр атам.

Гаҗәп матур, серле, якты, хатирәле

Кукмарамны әнә шулай мин яратам.

Беләм күптән: авыл түгел - син зур кала,

Тормышлар да монда, шөкер, алга таба.

Поездлар да җырдагыдай алга чаба,

Кукмарамның эшләре дә гөрләп бара.

Монда бар да истәлекле миңа, бар да якын-

Һәр урамың һәм дә йортың, һәр баскычың.

Таныш халкың төрле яктан беләм,

Шуңа сөям сине җаным-тәнем белән.

29.06.2017 ел

Заһид САФИН, Кукмара