Без бит горур татар!

Бөтен дөнья таный татарларны -

Бу бит шулай булу тиеш тә!

Сүздә генә түгел, татар халкы

Үзен күрсәтә бит һәр эштә.

Сабантуйлар гөрли дөнья буйлап,

Горурлык бу - татар халкына.

Чын күңелдән кунак итә барысын,

Дуслык-туганлыкның хакына.

Барча халык өчен зур бәйрәм бу,

Аеру юк динен, милләтен.

Дөнья халкын бергә берләштерү -

Шунда аның бөтен хикмәте.

Җыр һәм бию белән үрелеп бара

Мәйдан уртасында көрәшү.

Батыр калганының кулын кыса,

Үпкәләми генә көндәше.

Нинди генә уеннар юк монда:

Саный китсәң, бармак җитмәслек.

Бүләккә дә юмарт безнең халык -

Күпме өләшсәң дә - бетмәслек.

Бәйрәм бит ул бик күңелле була,

Алга киткән эшең булганда.

Сабантуйның нәтиҗәсе - көзен,

Амбар белән ашлык тулганда.

Харис МОСТАФИН