Суганны да көз көне утыртырга мөмкин

(Кукмара, 5 сентябрь, "Хезмәт даны") Без, гадәттә, сарымсакны көздән утыртып калдырабыз. "Земля-землица" газетасында бирелгән язмага караганда, суганны да көз көне утыртырга мөмкин. Түтәлләрдән җәйге уңышны җыеп алганнан соң, эре суганнар арасында үсми калган бик ваклары була икән, аларны сентябрь азагында янә утыртырга була. Кышкы суыкларга бирешмичә, алар иртә язда тишелеп чыгачак, көпшә җибәрмәячәк һәм июль башына инде эре суган булып җитешәчәк. Утырту алдыннан суганны төнгә көл суында яки "Сахалинский" гумат натриенда чылатып калдырырга кирәк, болай иткәндә, уңыш яхшырак булачак.