Кукмарада өч автомобиль катнашында юл фаҗигасе булган

Юл-транспорт һәлакәте 2 февральдә сәгать 20.00дә Кукмараның Магистральный урамындагы 60нчы йорт янында килеп чыга. Бу хакта район Дәүләт автоинспекциясендә хәбәр иттеләр. 

Беренчел мәгълүматларга караганда, Шкода Рапид автомобилен йөртүче, Г. Камал урамы ягыннан икенчел юлдан чыкканда юл йөрү кагыйдәләрен бозып, «Юл бирегез» дигән юл билгесе таләбен игътибарсыз калдырган, сулдан төп юлдан хәрәкәт итүче Шкода Суперб автомобиленә юл бирмәгән һәм аның белән бәрелешкән. Бәрелешүдән соң Шкода Суперб автомобиле Ә.Юнус урамы ягыннан икенчел юлдан чыккан Форд автомобиле белән бәрелешә.

Юл-транспорт һәлакәте нәтиҗәсендә Шкода Суперб автомобиленең арткы утыргычында булган пассажирлар — 28 яшьлек хатын-кыз һәм 2 яшьлек бала зыян күрә. Аларны Кукмара районы үзәк дәваханәсенә китерәләр һәм медицина тикшерүеннән соң, өйләренә җибәрәләр.

фото: район Дәүләт автоинспекциясе