Фото: Кукмарада “АВТОБАБАЙ-2018” конкурсы үткәрелде

Район юл хәрәкәте иминлеге дәүләт инспекциясендә 60 һәм аннан өлкәнрәк яшьтәге машина йөртүчеләр арасында “АВТОБАБАЙ-2018” конкурсы үткәрелде. Конкурсның максаты тәҗрибәле машина йөртүчеләрне юл хәрәкәте куркынычсызлыгын пропагандалауга тарту иде, дип яза kukmor-rt.ru сайты.

Бәйгедә катнашучылар иң элек юл йөрү кагыйдәләрен белү дәрәҗәсен күрсәттеләр, ә аннан соң автодромда машина йөртү буенча көч сынаштылар.

Конкурс нәтиҗәләре буенча беренче урынны Гомәр Нуриев яулады. Ул район данын яклап, Өлкәннәр көненә багышланган конкурсның республика этабында катнашачак.
Район конкурсында җиңүчеләрнең барысына да истәлек бүләкләре тапшырылды. Икенче урынга – Рәшит Камалиев, өченче урынга Зиннур Баймиевлар лаек булды. “Юл йөрү кагыйдәләрен белү” номинациясендә - Рәшит Камалиев, “Машинаны фигуралы йөртү” номинациясендә Владимир Собакиннар иң яхшы дип табылды.