Түбән Үрәс мәктәбендә махсус хәрби операциядә һәлак булган Николай Пичугинга истәлек тактасы урнаштырылды

Кукмара районының Түбән Үрәс мәктәбендә Украинада махсус операция вакытында һәлак булган Николай Пичугин истәлегенә мемориаль такта урнаштырылды.

Тантаналы митингта Кукмара районы башлыгы Сергей Димитриев, Мамадыш районы башлыгы Анатолий Иванов, һәлак булган ир-егетнең әти-әнисе, хатыны, туганнары, мәктәп укытучы-укучылары һәм башкалар катнашты.

Сергей Димитриев һәм Анатолий Иванов һәлак булган солдатның чын патриот булуын ассызыклап, туганнары һәм якыннарының тирән кайгыларын уртаклаштылар. Ул, Ватан чакыруына җавап биреп, аны сакларга алына.

Николай турында үзенең истәлекләре белән аның сыйныф җитәкчесе Вера Егорова уртаклашты.

«Николай – безнең иң яхшы чыгарылыш укучыларыбызның берсе. 5-11 сыйныфларда мин аларның сыйныф җитәкчесе идем. Ул бик яхшы укыды, аеруча математиканы яратты. Барысы да аңа ярдәм сорап мөрәҗәгать итә иде, ул беркемгә дә каршы килмәде. Спорт чараларында да актив катнашты. Мәктәпне тәмамлау белән институтка укырга керде. Аннары башкаларныкы кебек үк: уку, хәрби хезмәт. Берничә ел элек безнең сыйныф белән очрашу булды. Аның кәефе бик яхшы иде. Әти-әнисенә ярдәм итәр өчен, өенә якынрак эшкә урнашырга, авылда йорт төзергә бик теләде. Ул барысын да булдыра иде. Эш тә таптым, йорт та төзеде, гаилә дә корды. Аның ике кечкенә баласы калды. Бик кызганыч. Бу – бик зур югалту. Ул һәрвакыт безнең хәтердә калыр. Махсус хәрби операциядә катнашучыларның барысы да исән-сау әйләнеп кайтсын иде», - диде ул.

Николай Пичугин 1991 елның 13 октябрендә Мамадыш районының Яңа Оча авылында туа. 1998 елда Түбән Оча башлангыч мәктәбенең беренче сыйныфына укырга килә. Монда ул бишенче сыйныфка кадәр белем ала. 2008 елда Түбән Үрәс урта мәктәбен, 2013 елда Идел буе дәүләт физкультура һәм спорт академиясен тәмамлый.

Украинада махсус хәрби операция башлану белән 2022 елның 24 сентябрендә Николай мобилизацияләнә. Хәрби хәрәкәтләрнең берсендә аның гомере өзелә. Украинада махсус хәрби операция барышында күрсәткән батырлыгы, хәрби бурычына тугрылыгы өчен Николай Пичугин үлгәннән соң Батырлык орденына лаек була.

Чыгышлардан соң геройны бер минут тынлык белән искә алдылар һәм чәчәкләр салдылар.

Фото: Эльвира Иванова/ «Хезмәт даны»