Татарстанда декабрь башында һава торышы нинди булачагы билгеле

«МЕТЕО» фаразлау үзәге синоптигы Александр Ильин хәбәр иткәнчә,Татарстанда кыш башында явым-төшемсез һәм карсыз җылы һава торышы сакланачак. Температура нормадан 8-10 градуска җылырак. Бу декабрь башы өчен нормаль температура күрсәткеченнән экстремаль зур тайпылыш, дип яза «Татар-информ» МА.

Дүшәмбе республикада төнлә +2 градуска кадәр, ә көндез +4 градуска кадәр җылыта. Явым-төшем көтелмәсә дә, һава торышы болытлы булачак.

«Сишәмбедән пәнҗешәмбегә кадәр республикада һәм аның башкаласында төнге сәгатьләрдә −1 градуска кадәр суыта. Чәршәмбе төнлә бераз кар яву ихтимал. Көндез явым-төшем көтелми, температура +1..+3 градус була», — диде Александр Ильин.

Декабрьнең беренче атнасында җилнең юнәлеше еш үзгәрәчәк, әмма аның тизлеге секундына нибары 2-3 метрдан артмаячак.

Сишәмбе, чәршәмбе һәм пәнҗешәмбе республиканың зур өлешендә төнлә катнаш фазадагы явым-төшем көтелә. Көндез исә явым-төшем булмый. Иртән томан фаразлана.

«Җомга кичен республиканың төньяк һәм көнчыгыш районнарында бераз кар яварга мөмкин. Бу районнарда температура көндез 0 градус чамасы, ә кичен −3 градус чамасы була», — дип билгеләп үтте синоптик.

Фото: «Татар-информ» МА