Сайлау участокларында шәхси саклану чаралары өләшәчәкләр

Россия Федерациясе Конституциясенә төзәтмәләр буенча гомумроссия тавыш бирү көнендә сайлау участокларына килүчеләргә шәхси саклану чаралары бирәчәкләр. Бу турыда ТР Үзәк сайлау комиссиясе рәисе Андрей Кондратьев шулай дип белдерде.

Андрей Кондратьев: «Без хәзер Татарстанда барлык участок сайлау комиссияләрен шәхси саклану чаралары белән тәэмин итү буенча зур эш алып барабыз. Минем төп бурычларның берсе – сайлау процессында катнашучыларның: комиссия әгъзаларының һәм сайлаучыларның иминлеген тәэмин итү. Без аларга битлекләр, перчатка һәм дезинфекцияләү чаралары таратачакбыз: аларны сайлау участогына керә торган урында да, чыга торган җирдә дә алып булачак», - диде.

ТР Үзәк сайлау комиссиясе рәисе билгеләп үткәнчә, иң яхшысы – участокка шәхси саклану чараларын үзең белән алып килү.

«Һәр участокта термометрия узу мөмкинлеге, перчатка, битлек һәм авторучка алып булачак. Без тавыш бирүдә катнашучылар белән контактка кермәячәкбез. Тавыш бирергә килгән кеше сайлау комиссиясе әгъзасына билгеле бер арадан паспортын ачып күрсәтәчәк, без аны журналда теркәячәкбез, сайлаучы өстәлдә яткан бюллетеньне алачак. Шуннан соң ул тавыш бирү кабинасына керәчәк, анда да берникадәр үзгәреш бар. Роспотребнадзор таләбе белән, кабинада алгы стена булмаячак. Бу юнәлештә эш алып барыла инде», - дип искәртте Кондратьев. 

ТР Үзәк сайлау комиссиясе рәисе сүзләренчә, сайлау участокларында кешеләр агымы икегә бүленәчәк. Сайлаучылар бер ишектән кереп, икенчесеннән чыгып китәчәк.

«Татар-информ» агентлыгы Конституциягә төзәтмәләр буенча тавыш бирү бюллетеньнәрен сак астында 65 территориаль сайлау комиссиясенә китерәчәкләре хакында хәбәр иткән иде инде.

фото: Рамиль Гали