Кукмаралылар Абхазиядә уза торган «Алтын мәйдан» фестивалендә катнаша

4 июльдән 9 июльгә кадәр Абхазия Республикасының башкаласы Сухуми шәһәрендә «Алтын мәйдан-Абхазия» Халыкара фольклор инклюзив фестивале уза. 

Хәзерге вакытта районыбызның Зур Сәрдек авылы җирлеге мәдәният йорты хезмәткәрләре һәм үзешчәннәре дә әлеге фестивальдә. Кичә алар чараның ачылу тантанасында, ә бүген исә конкурсларда катнашкан. Алда тагын башка матур чаралар көтә.

«9 июльдә татар халкынын милли бәйрәме — Сабантуйны уздырып,10 июль көнне кайтырга чыгачакбыз.Абхазиядә буш вакытларыбызда шәһәр белән танышабыз. Сухуми шәһәре Кара диңгез буенда, матур табигать кочагына урнашкан. Рәхәтләнеп диңгездә коенабыз, кояшта кызынабыз. Күргәннәребезне сөйләп бетерерлек түгел. Безне яхшы каршы алдылар. Фестивальдән хисләр яңарып, күңел күтәренкелеге белән кайтып җитәргә язсын», — ди алар.