Югары уку йортларына бюджет урыннарына гаризалар кабул итү 25 июльдә тәмамлана

Россия вузларында бакалавриат һәм специалитет программалары буенча бюджет урыннарына укырга керү өчен гаризалар тапшыруның соңгы көне — 25 июль. Бу хакта РФ Фән һәм югары белем министрлыгы хәбәр итте.

Университетлар абитуриентларның конкурс исемлекләрен 27 июльдә үз сайтларында һәм «Дәүләт хезмәтләре» порталында урнаштырачак.

Ташламаларга ия булган абитуриентлар, олимпиада җиңүчеләре һәм призерлары, шулай ук максатчан укыту буенча керүчеләр ризалыкны 1 августка кадәр бирә алачак. Төп конкурс катнашучылары өчен бу вакыт 5 августка кадәр дәвам итә.

 Бюджетка кабул итү турындагы боерыклар 3 һәм 7 августта чыгарылачак. Бу даталар арасында «тынлык көннәре» булачак — әлеге вакытта яңа гаризалар бирү һәм элек тапшырылган документларны кире алу мөмкин түгел.

Магистратураның бюджет урыннарына документлар кабул итү срогын һәр вуз үзе билгели, әмма ул 20 августтан соңга калырга тиеш түгел. Түләүле уку өчен гаризаларны 20 сентябрьгә кадәр тапшырырга мөмкин.

Абитуриентлар документларын «Дәүләт хезмәтләре» порталы аша онлайн рәвештә дә җибәрә ала. Система белем турындагы мәгълүматларны, ташламаларны һәм казанышларны автомат рәвештә йөкли.

Абитуриентлар документларны кабул итү комиссияләренә чират тормыйча гына тапшыра ала, кәгазь гариза кирәкми. Сервис Дәүләт хезмәтләре порталында бар һәм «Мәгълүматлар икътисады» илкүләм проекты буенча гамәлгә ашырыла. Бары тик расланган хисап язмасы гына кирәк.

Документларны онлайн рәвештә Россиянең 1000 югары уку йортына тапшырырга мөмкин. Портал белем, ташламалар һәм казанышлар турындагы документларны автомат рәвештә йөкли. Абитуриентка бары тик уку юнәлешен һәм формасын гына сайларга кирәк - булачак студент биш югары уку йортына гариза тапшырырга (әмма һәркайсында биш юнәлештән дә артык түгел) хокуклы.

Конкурс исемлекләрендә үз урыныңны реаль вакытта күзәтеп барырга мөмкин. Кабул итү турында хәбәр шулай ук портал аша киләчәк.