2025 елның тугыз аенда Татарстанда 1,2 трлн сум салым җыелган

2025 елның тугыз аенда Татарстанда салым керемнәре 1,2 трлн сум тәшкил иткән. Бу турыда Федераль салым хезмәтенең республика буенча идарәсе җитәкчесе Марат Сафиуллин «Татар-информ»га биргән интервьюсында әйтте.

«Соңгы дүрт ел дәвамында ел саен бюджетка триллион сумнан артык салым түләүләре җыйдык. 2024 елда 1,595 трлн сум мобилизацияләнгән, 2025 елның тугыз аенда — 1,2 трлн сум», — диде Марат Сафиуллин.

Быелның гыйнвар-сентябрь айларында иң күп керемнәрне нефть чыгару биргән: 442,1 млрд сум, бу барлык салымнарның 40%ын алып тора. Ләкин дөнья бәяләренең кимүе аркасында әлеге күрсәткеч 2024 елның шул ук чоры белән чагыштырганда якынча 24%ка кимегән.

Икенче урында  — өстәлгән бәягә салым (НДС). Аның өлеше якынча 27% яки 321 млрд сум. НДС буенча керемнәр узган елга карата 40%ка арткан. Бу җитештерү һәм сату күләмнәренең, товарлар һәм хезмәтләргә бәяләрнең артуына бәйле.

Өченче урында — оешмалар табышына салым (177 млрд сум яки 14,7%). 2024 ел белән чагыштырганда керемнәр 13,5%ка арткан, бу 2025 елның 1 гыйнвареннан салым ставкасының 20дән 25%ка кадәр күтәрелүе сәбәпле.

Физик затлар керемнәренә салым (НДФЛ) шул ук вакытта 154 млрд сум яки гомуми сумманың 12,8%ын тәшкил иткән. Узган ел белән чагыштырганда ул 20,5%ка арткан: моңа хезмәт хаклары, премияләр, эш урыннары саны үсеше һәм 2025 ел башыннан НДФЛ ставкаларының прогрессив шкаласын киңәйтү булышкан.

Фото: «Татар-информ» МА