Ватанымны данлап Гимн җырлыйм! (шигъри мизгел)

Татар илем минем - гүзәл җирем,

Россиянең йөзе, түре дә!

Ирек, муллык, дуслык кояшлары

Балкып торсын илем күгеңдә!

Ватаным зур минем - мәңге яшә!

Һәр тарафта Халкым эзләре.

Барлык дәүләт, милләт, күршең белән

Өзелмәсен дуслык җепләре.

Татарстан алга - якты юлга!

Дөрес булсын кыйблаң, гамәлең

Җир шарында барча илләр белән

Тигез күтәрелсен әләмең!

Күңелләргә безнең якын сүзләр:

Идел, Болгар, Халкым, Казаным!

Сезне саклау, зурлау, данын яклау

Изге бурыч безнең, Ватаным!

Ватанымны данлап Гимн җырлыйм

Ватанымнан мәңге бизмәм мин.

Ватан кушса - утлар сулар кичәм.

Ватаныма тап төшермәм мин!

Заһид Сафин, Кукмара