Җырчы Гөлназ Закирова: "Ирем, туй күлмәгеңә сыйсаң, машина алып бирәм, диде"

- Ирем белән 4 ел элек өйләнештек. Туй көнендә миңа болай дигән иде: "Әгәр берничә елдан, бала тапканнан соң, туй күлмәгеңә сыйсаң, машина алып бирәм!" Концертка әзерләнгәндә, өйдә туй күлмәген киеп караганны күрде, әлбәттә. Әмма бу хакта ул да, мин дә сүз кузгатмадык. Ә инде концертта сәхнәгә машина ачкычы алып чыккач, шаккатым, ышанмадым. Моңа кадәр үземнең гонорар акчаларына алынган машинада йөри идем. Ирем "Kia Picanto" машинасы бүләк итте. Ә концерт үзе күңелле узды, бик күп чәчәкләр бүләк иттеләр. Бу - иҗатыма нәтиҗә ясау булды, - дип сөйләде Intertat.ru хәбәрчесенә Гөлназ Закирова.

Гөлназ Чаллының мәдәният идарәсендә эшли һәм музыка көллиятендә укыта. Ә бүгенге көндә ул 2,4 яшьлек улы Илдар белән декрет ялында. "Мин үземне җырчы дип санамыйм. Тавыш мөмкинлекләрем бар, шуны халыкка күрсәтергә телим. Максатым - җырлау түгел, ә иҗат итү. Күп кенә популяр артистларга җырлар язып бирәм. Әйтик, хәзерге вакытта хитка әверелгән Ришат Төхвәтуллин башкаруындагы "Исеңдәме?" җырының көен мин иҗат иттем. Мин - профессиональ композитор. Әтием (Илгиз Закиров - автор) - үзешчән композитор, аның махсус белеме юк. Шуңа күрә ул миңа укырга кушты, чөнки композитор өчен белемле булу бик мөһим. Башта музыка көллиятен, аннан Казанда консерватория тәмамладым", - диде Гөлназ Закирова.

Эльвира ШАКИРОВА

http://intertat.ru