Хезмәт баланы бозмый

Укучыларын күмәк хуҗалык басуына бәрәңге чүпләргә җибәргән өчен Ядегәр мәктәбе директорын җаваплылыкка тарту белән килешмим. Без мәктәптә укыганда бер ай буе иртәнге сәгать сигездән кичке бишкә кадәр бәрәңге уңышын җыярга йөри идек. Салкын, өстән яңгыр ява дип тормадылар, басудан иртәрәк кайту юк иде. Моның өчен бер тиен акча да түләмәделәр, акча мәктәп ихтыяҗларына тотыла, диделәр. Әти-әниләрнең тавыш кубарып йөргәне булмады. Укуны да аксатмаска тырыштык, тормышта да үз урыннарыбызны таптык. Хезмәт кешене бозмый ул, ә менә компьютер артында утыру боза. Эшләп үскән бала гына тәртипле була. Кирәкме икән укучылар алдында укытучының абруен төшерү?

Хезмәт ветераны