Кукмара районында узган рейд вакытында Дәүләт автоинспекторлары алкогольле эчемлек куллану билгеләре булган машина йөртүчене ачыклаган

11 мартта 8.00 сәгатьтән 10.00 сәгатькә кадәр Кукмара районының «Кукмара-Шәмәрдән» автомобиль юлының 1нче чакрымында Дәүләт автоинспекторлары, участок инспекторлары белән берлектә, «Тоннель» операциясен үткәрде. Бу хакта районның Дәүләт автоинспекциясендә хәбәр иттеләр.

Рейд барышында юл хәрәкәте кагыйдәләрен бозуның 17 очрагы ачыкланган. Алар арасында түбәндәгеләр бар: куркынычсызлык каешын кулланмау (7 очрак), дәүләт номерлары укылмый торган, ОСАГО полисы булмаган килеш транспорт чарасы белән идарә итү, җәяүленең юл йөрү кагыйдәләрен бозуы (2шәр очрак), транспорт чарасын тиешле тәртиптә теркәмәү, штрафны вакытында түләмәү, төзексез хәлдәге транспорт чарасы белән идарә итү, шоферның ОСАГО полисына кертелмәве (1әр очрак).

Моннан тыш, исерткеч эчемлек куллану билгеләре булган машина йөртүче дә ачыкланган. Аның транспорты махсус тукталышка куелган. 

Районның Дәүләт автоинспекциясе машина йөртүчеләрне мондый төр массакүләм тикшерү эшләренең даими рәвештә алып барылачагын искәртә.

фото: архив, Эльвира Иванова/ «Кукмор-информ»