«Кырым язы» фестивале кысаларында Кукмара районының яшь гражданнарына тантаналы рәвештә паспортлар тапшырылды

Кырымның Россиягә кушылуына җиде ел тулу уңаеннан оештырылган «Кырым язы» фестивале кысаларында Кукмара районының яшь гражданнары үзләренең төп документын – Россия Федерациясе гражданины паспортын алдылар.

Паспортларны тапшыру тантанасы ЗАГС бүлегендә узды. Анда район халкы үз тормышындагы иң мөһим документларны ала.
Чара район Башкарма комитеты җитәкчесенең социаль мәсьәләләр буенча урынбасары Айгөл Әхмәтшина, Россия Эчке эшләр министрлыгының Кукмара районы буенча бүлегенең миграция мәсьәләләре бүлеге начальнигы Илсөяр Вәлиева, күпфункцияле үзәкнең Кукмара филиалы бүлеге начальнигы Лилия Миннемуллина, район ЗАГС бүлегенең баш белгече Адилә Камалетдиновалар катнашында узды.

Айгөл Әхмәтшина, 14 яшьлек кукмаралыларны котлап, бу көннән башлап аларның Россия Федерациясенең тулы хокуклы гражданнары булуларын билгеләп үтте.

Фото: Эльвира Мөбарәкшина/ «Хезмәт даны»