Кукмарада спорт: 2020 ел нәтиҗәләре

Районыбыз спортта да сынатмый. «Зилант», «Ялкын», «Олимп», «Атлант» спорт мәктәпләре, «Аргамак» командалары районда гына түгел, республика һәм Россия күләмендә үткәрелгән чараларда да актив катнашып, югары күрсәткечләргә ирешә. Кукмарада һәм авыл җирлекләрендә спорт белән шөгыльләнү өчен бар мөмкинлекләр дә тудырыла: универсаль спорт мәйданчыклары, хоккей тартмалары ачыла, төрле түгәрәкләр эшли. Кукмараның чаңгы, тау чаңгысы базалары райондашларыбызны гына түгел, республика кунакларын да үзенә җәлеп итә. 

Әле күптән түгел генә Купка һәм Аш-Буҗи авылларында хоккей тартмалары ачылды. Бу корылмалар «Авыл территорияләрен комплекслы үстерү» федераль программасы ярдәмендә эшләнде. Мәдәни чараларга шактый киртәләр куелган заманда яшьләр мондый корылмаларга аеруча мохтаҗ. Хоккей мәйданчыгында бөтен шартлар да булдырылган: зур уен тартмасы, яңа киенү-чишенү бүлмәләе бар. Мәйданчыкларда турнирлар башланып китте.