Кукмарада һәм Манзарас авыл җирлегендә үзара салым буенча референдум уза

Бүген Кукмарада шәһәрендә һәм Манзарас, Кәчимир, Киндеркүл, Өлге авылларын берләштерүче Манзарас авыл җирлегендә үзара салым кертү буенча референдум уза. Манзараста - өч, Кукмарада ун сайлау участогы эшли. 

Барлык участокларда да референдум үткәрү өчен алдан әзерлек чаралары күрелеп, җаваплы кешеләр билгеләнгән. Аларның һәммәсендә дә комиссия вәкилләре эшли.

- Безнең участок иртәнге сәгать 7.00дә ачылды. Сәгать 20.00гә кадәр һәркем тавыш биреп, 2020 елда үзара салым күләмен 500 сум итеп билгеләү турында фикерен белдерә ала, - дип хәбәр итте Кукмараның 1669нчы сайлау участогы рәисе Диләрә Бариева.

Участокларга килә алмаучыларның өйләренә комиссия вәкилләре үзләре бара. Сайлаучылар тавыш бирү кәгазенә үзенең фикерен билгеләп, бюллетеньне махсус урнага сала.