Бурсык-Елга авылында, күңелле итеп, Сабантуйга яулык җыйганнар

Бурсык-Елга авылында Сабантуйга сөлге җыю бәйрәме булды. Борынгы йолаларыбызны искә төшереп, милли киемнәребезне киеп, гармун моңнарын авылга таратып бүләк җыйдык. Авылның яше-карты да читтә калмады. Биргән бүләкләргә рәхмәт әйтеп биедек, җырладык. Һәрбер өй түрендә безне шат күңелле апалар каршы алды. Сөлге җыеп бетерүгә авылның уңган-булган киленнәре кайнар чәй, татлы ризык белән мул итеп табын кордылар. Авылның батыр, хезмәт сөючән егетләре шашлык пешерделәр, балачагалар туңдырма белән сыйландылар. Барыбызда исән сау булыйк, Сабантуйлар гөрләп торсын, илебез тыныч булсын, йөзебездән шат елмаю мәңге китмәсен.

Альфия ГАЗИЗУЛЛИНА