Закон бозу фактлары турында “Халык контроле”нә хәбәр ит

Дәүләт хакимияте органнарының гражданнар белән берлектә эшләү системасы - бик уңайлы әйбер. Чөнки гражданнарыбыз беркая бармыйча, өендә яки эшендә интернет аша гына үзләрен борчыган сорау белән мөрәҗәгать итә, шулай ук аның буенча кабул ителгән карарларны күзәтә ала. "Халык контроле" дәүләт мәгълүмат системасының хәбәрдарлыгы һәм ачыклыгы, хәбәрне тапшырган вакыттан алып, анда күтәрелгән проблеманы хәл иткәнгә кадәр күзәтеп тору мөмкинлеге бирә.

Татарстан Республикасы Дәүләт алкоголь инспекциясенең Арча территориаль органы "Халык контроле" системасына этил спиртын, алкогольле һәм спиртлы продукция җитештерү һәм әйләнештә йөртү буенча закон бозу фактлары турында дөрес мәгълүмат тапшырган гражданнарны матди бүләкләнү хакында искә төшерә.

Алкогольле һәм спиртлы продукция әйләнеше буенча закон бозу турында мәгълүматлар урнаштыруның бер кыенлыгы юк: моның өчен Татарстан Республикасы дәүләти һәм муниципаль хезмәтләр күрсәтү порталында (uslugi.tatarstan.ru) шәхси кабинетта теркәлеп, "Халык контроле" бүлекләренең берсендә, фотосурәте белән (фотосурәтнең булуы - мәҗбүри таләпләрнең берсе, ягъни мөрәҗәгать итүче фикеренчә, закон бозуга юл куелган сәүдә объектының фотосурәте) закон бозу турында хәбәр генә урнаштырырга кирәк.