Кукмаралылар Актанышта 46 команда арасында беренче урын яулады

Актанышта Татарстан Республикасының беренче Президенты Кубогына 2003-2005 елгы яшүсмерләр арасында көрәш буенча ярышлар узды.
Анда бөтен республикадан 46 команда – 400гә якын спортчы катнашты.

Кукмаралылар, 422 очко җыеп, иң көчле көндәшләре – Әлмәт һәм Казан командаларын артта калдырып, беренче урынга чыктылар. Ярыш нәтиҗәләре буенча үз үлчәү авырлыгында Инсаф Кәримуллин, Алексей Даниловлар чемпион калдылар. Богдан Григорьев, Артем Григорьев, Инсаф Гыйльметдиновлар – икенче, Рүзәл Тимергалиев, Илшат Гыйниятуллин, Илсаф Фәхретдиновлар мактаулы өченче урынны яулады.

- Турнирда бөтен Татарстаннан иң көчле спортчылар катнашты. Алар ике көн дәвамында ун авырлык категориясендә үзара көч сынаштылар. Ярышлар бик мавыктыргыч килеп чыкты, иң мөһиме - Кукмара спортчылары лаеклы чыгыш ясадылар. Икенче ел рәттән безнең көрәшчеләр Татарстан чемпионнары булалар, - диде балаларны сәламәтләндерү-белем бирү үзәге директоры Нуретдин Зыятдинов.

фото: Алсу Гатауллина/ "Хезмәт даны"