Уку елына «бишенче иҗади чирек» кертергә тәкъдим иттеләр

Россия Иҗтимагый палатасы секретаре урынбасары Владислав Гриб мәктәп укучыларына иҗади һәм фәннән тыш дәресләр уздыру өчен уку елын ике атнага озайтырга кирәк, дип белдергән. Бу хакта «Газета.Ру» сайты яза, дип хәбәр итә «Татар-информ» МА.

«Июньнең беренче ике атнасын билгеләр өчен түгел, ә уку елы дәвамында вакыт җитми калган иҗади дәресләр өчен „бишенче чирек“ итү яхшы булыр иде. Бу төрле дәресләр — иҗади, креатив, робототехника, сәнгать һәм музыка иҗаты була ала», — дигән Владислав Гриб.

Аның фикеренчә, «бишенче иҗади чирек» мәктәп укучылары өчен мөһим, чөнки уку елы дәвамында аларга фәннән тыш дәресләргә вакыт җитми.

Фото: «Татар-информ» МА