Татарстанда бүре белән эт гибридын ауларга мөмкин булачак

Татарстанда бүре белән эт гибридын  аучылык ресурсларына кертәләр. ТР Экология кодексына үзгәрешләр кертелә торган закон проектын бүген ТР Дәүләт Советының 17 нче утырышында кабул иттеләр.

"Федераль кануннар нигезендә төбәкләр үз кануннары белән имезүчеләрне һәм кошларны аучылык ресурсларына кертергә мөмкин дип рөхсәт ителә. Татарстан территориясендә аучылык ресурсларына соры карга кертелгән. Закон проекты белән күрсәтелгән пунктка бүре белән эт катнашмасы – аучылык җирләре табигый яшәү тирәлеге булган хайван заты өстәргә тәкъдим ителә", - дип сөйләде депутат Нәҗип Хаҗипов.

Ул билгеләп үткәнчә, ел саен республиканың аучылык җирләрендә бүре белән эт аралашуы күзәтелә, алар көтүләргә җыела һәм кешеләр һәм хайваннар өчен куркыныч тудыра.

"Республикада кыргый хайваннар популяциясенә зыян китерү очраклары бар. Биологик ресурслар буенча ТР Дәүләт комитетының район белгечләре һәм аудан файдаланучылар ау җирләрендә әлеге ерткычлар тарафыннан куып китерелгән һәм буып үтерелгән кыр кәҗәләренең мәетләрен даими табалар, бу бигрәк тә кыш көне тирән кар шартларында еш була. Бәяләнгән зыян якынча 3 млн сум тәшкил итә", - дип ассызыклады парламентарий.

Моннан тыш, аның сүзләренчә, бүре белән эт катнашмасы котыру авыруын тарата. » Ә алар кешеләрдән курыкмаганга, торак пунктларга якын килеп, йорт хайваннары һәм кеше белән элемтәгә керә алалар", – диде Хаҗипов.

Ул агымдагы елның 11 аенда гына да республикада котыру авыруының 24 очрагы ачыклануын искәртте.