Кукмарада ут шәхси йортның хуҗалык корылмаларына зыян китергән

11 июльдә 14.17 сәгатьтә районның 117нче янгын сүндерү-коткару часте элемтә пунктына телефоннан Кукмара шәһәренең А. Королев урамындагы хуҗалыкларның берсендә янгын чыгу турында хәбәр килеп ирешә. Бу хакта районның 117нче янгын сүндерү-коткару частендә хәбәр иттеләр. 

Янгын сүндерү подразделениесе хезмәткәрләрен йорт хуҗабикәсе каршы ала, ишегалды корылмаларында һәм өйдә кешеләр юклыгын хәбәр итә. Бу вакытта ишегалды хуҗалык корылмалары яна, ялкын телләренең аннан 4 метр читтә урнашкан торак йортка күчү куркынычы була.

138 квадрат метр мәйданда хуҗалык корылмаларының түбәсе янып бетә, утның торак йортка күчүенә юл куелмый. 

Зыян күрүчеләр һәм һәлак булучылар юк.